قصة غادة الحلقة الثالثة
بالعربي / مر اليوم الثاني ومحصلتش حاجة جديدة وجه يوم مشوار الشبكة
راحت فاطمة وكريمة وطبعا غادة…احمد ووالدته واخته حنان هتلاقيهم ف القاهرة عشان هي متجوزة هناك…
راحو كلهم عند جواهرجي تعرفو حنان
حنان:سلامو عليكو
الجواهرجي:وعليكم السلام ازيك يامدام حنان
حنان:الحمدلله…احنا جايين ناخد شبكة عروسة اخويا من عندك…ورينا احلى شغل
الجواهرجي:من عنيا يامدام الف مبروك يا استاذ
احمد:الله يبارك فيك
خديجة:تعالي ياحبيبتي واقفة مكسوفة ليه تعالي نقي شبتك…تعالي ياام مصطفى انتي وكريمة واقفين بعيد ليه
فاطمة بتشاور لخاتم :بصي ده ياغادة حلو اوي
غادة بعدم اهتمام:ايوة حلو
الجواهرجي:هوري حضرتك حاجة تليق عليه
خديجة:الله حلو اوي ايه رأيكم
كريمة:ايوة حلو ماشاءالله…تمام ياغادة كده
غادة:آه تمام
حنان:خلاص احنا هناخد دول…لو سمحت ورينا دبل رجالي
خديجة:اختاري ياغادة لخطيبك دبلته
غادة باحراج:احم دي حلوة
حنان:ايوة وزي بتاعتك…خلاص على بركة الله يااحمد
احمد:ايوة تمام خلاص غادة الي اختارت مفيش كلام بعدها
غادة ماردتش بصتله ودورت وشها
احمد استغرب الكل اتحرج من اللي عملته…حاسب احمد وروحو لبيت حنان شوية وبعدها رجعو البلد
في بيت غادة
فاطمة:انتي يابت ياقليلة الادب والله لقول لابوكي يربيكي
كريمة:ليه ياماما عملت ايه
فاطمة:اسكتي انتي يابت…ايه الي انتي عملتيه عند الصايغ
غادة:عملت ايه؟
فاطمة:دورت وشك وجوزك بيكلمك ياقليلة الادب…دلوقتي يقولو علينا ايه
طب حتى قولي شكرا حتى اضحكي فوشه…
غادة:ماتقوليش جوزي…انا اصلا موافقتش عليه ولو بيحس على دمه هيفهم ويسيبني فحالي
ابوها دخل على آخر كلمة
محمد:بتزعقي ليه…مين ده الي يسيبك فحالك
كريمة خافت يضربها:مفيش ياحاج
فاطمة:قلتلك اسكتي انتي وماتدخليش…كسفتني ياحاج قدامهم…الولا بيكلمها هي بصت له ودورت وشها بعيد ولا كأنها سامعاه
محمد عاوز يضربها:ياقليلة الادب…عيلة مفعوصة زيك هتصغرني فالبلد هيقولو ايه الحاج محمد ماعرفش يربي بنته
كريمة بتمسك فيه:صلي عالنبي ياحاج دي لسه عيلة مش عارفة حاجة وماعرفتش ترد من كسفتها….ماتعصبش نفسك انا هتكلم معاها واوعيها
محمد(بعصبية):غوري من وشي يلاااااااااااااااا
غادة راحت تجري على اوضتها ولحقتها كريمة…
غادة بتعيط بحرقة وكريمة بتهدي فيها
كريمة:بس ياحبيبتي ماحصلش حاجة لكل ده
غادة صرخت فيها:ماحصلش حاجة…انا قليلة ادب وعيلة
كريمة:والله ياحبيبتي قلتله كده عشان مايضربكيش حقك عليا
غادة:ياناس مش عاوزاه ياعالم مش عاوزااااااااه اموت نفسي يعني عشان تحسو باللي جوايا…
كريمة:حرام عليكي الي بتقوليه ده…مش عاوزاه ليه فيه ايه يتعيب..هتفضلي كده لحد ربنا مايشيل النعمة من وشك…ارضي بنصيبك ياحبيبتي
غادة:مفهوش حاجة تتعيب بس انا مش حاسة بيه ياكريمة
كريمة:بكرة تحسي بيه…ولا عاوزة تتجوزي واحد مش متعلم ويقعدك من الكلية…انا تعبت اراضيكي وادلع فيكي خلاص بقى زودتيها اوي
غادة:عاوزة اقعد لوحدي ياكريمة
كريمة قامت:ماشي…بس فكري فكلامي كويس…
احمد:هي بتتصرف معايا كده ليه
خديجة:ياحبيبي دي مكسوفة مش اكتر
احمد:مكسوفة ايه…انتي مش شفتيها عملت ايه…بقولك ايه ياماما خلاص مش عاوزها اصرفي نظر عن البنت دي
خديجة:يالاهوي يا بني الجواز مش كده ياحبيبي…ده عاوز نفس طويييل افرض كنت اتجوزتها وعملت كده هتسيبها عشان حاجة هايفة
احمد:هايفة ولا مش هايفة ياماما مليش دعوة…لما تكلمني تكلمني باحترام وادب
خديجة:طبعا ياحبيبي امال ايه ماعاش ولا كان الي يقل ادبه عليك…اهدى انت كده دي لسه صغيرة وماتعرفش حاجة اكيد اتكسفت مش قصدها…انا هبقى اكلمها وافهمها انها ماتتكسفش منك وتكلم عادي
خديجة مش شايفاها مكسوفة وحست من تصرفها بحاجة بس ماتقدرش تقول كده قدام احمد عشان ماتكبرش فدماغه المشكلة ويصر انه انه يسيبها
خديجة قاعدة هي وكامل لوحدهم بيشربو شاي وبتحكيله اللي حصل
خديجة:وبس ياخويا راسه والف سيف مش عاوزها وقدعت اهديه واقوله الجواز مش لعبة وطول بالك عليها صغيرة ومش عارفة وهفهمها بس الصراحة الي عملته مايعملهوش بنات الناس المؤدبة…لفت وشها كأنها ولاسامعاه ولا طيقاه
كامل:لا انا ماينفعنيش الكلام ده…لو مش هتعامل جوزها بادب يبقى مش متربية ولازمها رباية من اول وجديد…مش لازم نسكت ونسيبها بتدلع كده…انا ليا كلام مع الحاج محمد
خديجة:عندك حق ياخويا عشان يكلم امها تفهمها وتوعيها هي هتعرف تكلمها ازاي احسن مني و انت عارف احمد عصبي شويتين وبيزعل بسرعة
كامل:انا هروح للحاج محمد اكلمه دلوقتي…
محمد:الحاج كامل يااهلا وسهلا يادي النور اعمل شاي ياعلي
علي:حاضر يامعلم
كامل:ازيك ياحاج محمد
محمد:نحمد ربنا ايه الخطوة العزيزة دي نورتني
كامل:الحقيقة يا حاج كامل انا جاي لك فموضوع وواخد على خاطري اوي
محمد:خير يا حاج ماعاش ولا كان الي يزعل الحاج كامل
كامل:اكيد الحاجة حكتلك حصل ايه عند الصايغ
محمد فهم هو يقصد ايه:معلش ياحاج البت لسه صغيرة ومش فاهمة حاجة وبتتكسف
كامل:مانا جيت اكلمك فكده…خلي الحريم يقعدو معاها ويفهموها اصل الباشمهندس خلقه ضيق حبتين وبياخد على خاطره بسرعة
محمد:وماله على راسي خاطر الباشمهندس احمد حقه عليا
كامل:تسلم راسك ياحاج هو خلاص الحاجة قالتله انها لسه صغيرة وماقصدتش بس خلي الحاجة تكلمها عشان ده مايحصلش تاني
محمد وهو يغلي:طبعا ياحاج مش هيحصل تاني….جيب شاي ياعلي
محمد فالمغرب جاي عالبيت وعينيه بتغلي من العصبية واول مادخل وبصوت هز البيت
محمد:غادددددددددددددددددددددددددددددة
فاطمة جات تجري على الصوت:ايه ياحاج في ايه
محمد:فين مقصوفة الرقبة بنتك
غادة جاية وهي مرعوبة ومش عارفة فيه ايه
غادة:ايوة يابابا
محمد:حتة عيلة زيك تصغرني قدام الحاج كامل…انا ماعرفتش اربيكي يا قليلة الادب
وضربها قلم على وشها وقعت من قوته على الارض
كانت كريمة الي بتحوش عنها راحت بيتها
محمد مسكها من شعرها وقعد يضرب فيها وفاطمة بتحاول تحوشو
فاطمة:بس ياحاج البت هتموت فايدك يالاهوي
محمد سابها بعد مالقاها مابقتش قادرة تصرخ
محمد:قسما بالله يمين احساب عليه لو عملتي كده تاني لدبحك بايدي
آدي اللي خدناه من العلام البت عيارها فلت ومابتحترمش جوزها
محمد خرج وهو متعصب،فاطمة بتقومها وتاخدها على اوضتها
غادة بتعيط بس من غير كلام
لما وصلو الاوضة نامت عالسرير ودورت وشها للحيطة
فاطمة قلبها بيوجعها على بنتها بس مش عارفة تعمل ايه لانها شايفة جوزها عنده حق
كريمة فبيتها قلقانة على غادة عشان كانت بتعيط اوي لما هي نزلت
ابراهيم:مالك متنحة كده ليه
كريمة:البت غادة صعبانة عليا اوي…اصلها مش عاوزة تتجوز
ابراهيم:ومش عاوزة ليه ده احمد باشمهندس قد الدنيا زينة شباب البلد
كريمة:انا عارفة ياخويا وقلتلها بس هي لسه صغيرة ومش فاهمةالدنيا
تيليفون البيت بيرن
كريمة:الو…ايوة يامصطفى ياحبيبي ازيك ياخويا…ايييييييييييه مستشفى ايه
ايه الي حصل…يالاهووووووووووووي انا جاية دلوقتي
كريمة قعدت تصوت وتعيط وابراهيم بيسألها في ايه
ابراهيم:يا ولية في ايه
كريمة بتعيط بصوت عالي:غادة حاولت تنتحر…..
يجب أنت تكون مسجل الدخول لتضيف تعليقاً.