رواية هديل وغازي الفصل السابع والثلاثون

من الإعصــار جئتِ…أم النسيم..؟؟

وناري أنتِ….أم بـــرد النعيـــم..؟؟

مزاجُك لا يقــر له قــــــرار ..

كـــا البرق..لا يقر على الغيــوم ..

يجرعني..السعادة حين يهوي ..

وحين يشـــاء..يسقيني همـــومي ..

ويمنحني السلام..وحين يطغى ..

يقلبنــــي على جرحِ أليـــــمِ …

المرحوم بأذن الله تعالى..غازي القصيبي…

قفلت المذكرة ووقفت بتصميم على اللي في بالها..

لفت حجابها على راسها..

لبست معطفها وخرجت من القصر..

توجهت للإسطبلات…ترددت بلحظة..

وبعدها دفنت كل الخوف بصدرها وكملت طريقها..

هديل بصوت جامد\فكتور فلنعقد إتفاقاً..

ألتفت عليها فكتور باستغراب..

وقف لحظات يناظرها من دون مايرد عليها..

قرب منها خطوتين وهي ظلت ثابتة بمكانها..

فكتور\أستميحك عذراً..؟؟

هديل\فلنعقد إتفاقاً..

فكتور\هل هذا يعني باننا أصبحنا أصدقاء..؟؟

هديل\لا..فأنت عدوي ولن اهبك إسم صديق لأنك لا تستحقه…

فكتور\إن كنا لن نصبح اصدقاء فلا اعتقد بأننا سنعقد إتفاقاً..

هديل\تريدني ان أثق بك..؟؟

فكتور\اجل..

هديل\لن أفعل أبداً..

فكتور يبتسم\كيف لك ان تعقدي إتفاقاً مع شخص لاتثقين به..

هديل\هذا ماعلمتنا إياهـ الدول والرؤساء..

هم لايثقون ببعضهم ولكن يعقدون الإتفاقيات ..

فكتور\ألا تخافين مني..؟؟

هديل\لِم هذا السؤال هل ستوذيني..؟؟

فكتور\ههههههههههههه إن اعجبني الإتفاق لن أفعل..

هديل\قد يعجبك..

فكتور\حسناً ايتها الصغيرة لنرى إن كان ماتعرضينه يناسبني..؟؟

هديل\ليس قبل أن تعدني بأنك لن تؤذيني..

فكتور\سأكون صادقاً معك..أنا لا أكرهك ويوسفني الأذى اللذي تسببت به لك..

هديل\كـــاذب..كنت فخوراً بإيذائي..

فكتور\بعدما علمت من العمال بما فعله السيد بك هنا..أعني عندما ضربك بالسياط..

ندمت على إيذائك كثيراً..

هديل\لا أصدقك..

فكتور\كرهتك لأنك تخصين السيد وتنتمين إليه..فأردت إيذاك كي يعلم بذلك..

هديل بقهر\أنا لا انتمي إليه..ولا إلى احد..

فكتور\لماذا لم تخبريه بانني اتسبب لك بالأذى..؟؟

هديل\هذا امر لا يعنيك..

فكتور\بالتاكيد ليس لحمايتي..أخبريني لماذا لم تخبريه؟؟

هديل\اتيت نعقد إتفاقاً وليس لتستجوبني..

فكتور\ماللذي تريدينه..؟؟

هديل\مساعدتك لي..

فكتور\في ماذا..؟؟

هديل بتردد\أولا أخبرني إن لم توافق على طلبي ماذا سيحدث..؟؟

فكتور\لا أعلم..أنتي لا تثقين بي..وانا أجهل ماتريدين…

هديل\انت لن تخبر السيد بإتفاقنا حتى وان لم نتفق؟؟

فكتور\ بالتاكيد لن أفعل..

هديل\حسناً أنـ………………..

فكتور بعصبية يقاطعها\قبل ان تخبريني يجب أن تعلمي شيئاً..

ناظرت فيه بتسئول وخوف..

فكتور\لا تثقي بي…أعرف نفسي جيداً..ربما أقوم بإلحاق الضرر بك ..

هديل\ماذا تعني..ولماذا تفعل ذلك..قلت لتوك بانك نادم على إيذائي سابقاً؟؟

فكتور بصوت هادى\أنتي تعلمين بانك جميلة أليس كذلك؟؟وعيناك ساحرتان جداً..

أنتي سببتي لي الأرق..والتفكير الدائم بك..

أرتبكت وتراجعت كم خطوة على ورى ويدها على لثمتها..

والخوف منه تضاعف لدرجة كبيرة..

فكتور بغضب\إرحلي من هنا…فانا أكرهـ أن أوذيك أكثر مما فعلت..

فأنتي تتعرضين للكثير من الأذى..وأخشى عليك من نفسي..

أنسحبت من المكان من دون ما تنطق بحرف..

خائفة مرتجفة..مو مصدقة اللي سمعته منه..

ركضت راجعة القصر وهي تبكي..

الله ياخذك مو على أساس تكرهني وتكرهـه..

أنت عدوي مثله..

وأنا ابي اكسب عدو عدوي لصالحي..

ماصبرت عليك الا عشان تهربني منه..

وألحين أنت وإياهـ..

جلست على الدرج تحت الثلج..

ياويلك ياهديل كنتي بتخلينه يهربك وهو يبي ……..

حسبي الله ونعم الوكيل على ابليس..

لو انحبس طول عمري هنا ولا ارجع لهلي..

كله ولا يرقب مني..

لاهو ولا الحقير الثاني..

مسحت دموعها وهي تتنهد..

آآآآآهـ يومه صوتك أشقاني وعذبني..

وش يصبرني على فراقك أكثر من الفراق اللي عشته..

وينـــه أبوي..؟

ليش ماتقولين له يجيبني لك..

ليه ما تقولين لأخواني يدوروني ويرجعوني من بعثتي الوهمية..؟؟!

معقولة نسيتوني..؟؟

ولا تبريتوا مني..؟؟

ماهو ذنبي يومه والله ماهو ذنبي..

حرمني منكم وحرمني من نفسي..

فديتك يومه وحشتيني..

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛ ؛؛؛؛؛؛؛؛؛؛ ؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛

راجح بابتسامة\الحمدلله على السلامة..

رشا\الله يسلمك..

راجح\آخر الكسرات..

رشا\ههههههههه ان شاء الله…

راجح\يعني ماتبين تغيرين رأيك وتجين معي أنتي وذا النشبة؟؟

رشا باحراج\رحلتك بعد ساعتين..وأرجولي توها ماتعودت بعد الجبس..

مرة ثانية إن شاء الله..

راجح\رشا أسالك سؤال..وتجاوبين بصدق..

رشا بحذر\على حسب السؤال..

راجح\يعني ممكن تكذبين علي؟؟

رشا\لا ماراح أكذب..بس اذا ماناسبني سؤالك ماراح اجاوب عليه..

راجح\وإذا ناسبك..؟؟؟

رشا بارتباك\يمكن اجاوب..

راجح جلس قريب منها ولم يدينه حوالينها..

قرب فمه من اذونها وهمس..

راجح بهمس\أنتي تحبيني من سنين وأنا أعرف هذا الشيء…

من قبل لا تتزوجين سعود..لما خطبتك من طالب..عرفت إن سعود خطبك ووافقتي.

أنسحبت بهدؤ رغم إني أنصدمت منك..ومن سرعة موافقتك..ومن سرعة الزواج ككل..

كيف توافقين عليه وإنتي تحبيني..؟؟

رشا نفضت نفسها تبعد عنه ووقفت بعرج..

رشا بضيق\أنت مو مستوعب اللي جالس تقوله..هذي اوهام مالها اي صحة..

وش أحبك؟؟من وين جايب هذا الكلام..؟؟

راجح يوقف\ماهو انا اللي اتوهم…وأعرف زين وش أقول..

صار لنا ثلاث سنين متزوجين..وإنتي تحاولي بكل طاقتك تنهي الزواج..

تمنيت أعرف أسبابك وانتي مو راضية تقولين..

رشا بخوف\من البداية شروط زواجنا واضحة لك..ليش ألحين تتذمر منها..

إذا مو عاجبتك طلق..

راجح بحدة\مو عاجبني..وماراح اطلق..

رشا سكتت وماردت عليه..

راجح\ماجاوبتي على سؤالي..

رشا تسترجع في بالها كلامه تحاول تتذكر وش سؤاله..بس ما عرفت السؤال..

راجح\ليه وافقتي تتزوجين سعود؟؟

رشا بهدؤ\سؤال سهل لأنه خطبني وهو ماينرد..

راجح\واثقة بسهولة السؤال..

رشا\الاجابة مثل ماوصلتك..

راجح\واللي يقول إنك كذابة..

رشا بعصبية\انت مدري وش تفكر فيه..جاوبتك على سؤالك..

وقلت لك اوهامك مو صدق..

راجح\كـــــــــــــذابة..رشا إعترفي بسرك..

رشا خنقتها العبرة من الخوف\مافيه سر مافيه شيء ..

مافيه شيء ماصار شيء..ماصار شيء..

راجح يضمها بقوة\طيب إهدي..ليه خايفة كذا..

أنتي تحبيني وانا اعرف هذا الشيء وبلسانك قلتيها..

كنت ناوي أعاقبك على السنتين اللي قضيتيها في بيت أخوك وأنتي تحبيني..

بس ليه خجلانة من هذا الشيء ليه..؟؟

رشا\مــ أحبك لاتكذب ماقلته..

راجح يقبل جبينها\نتفاهم لما أرجع..

أنتي ريحي نفسك ورتبي أفكارك..الخوف ماله مبرر ولا له داعي..

انا مستحيل أضرك..

سافر بعد ماوصلها لبيت أم غازي..

وحلفت ماتطلع من بيت أخوها لو يسحبها راجح سحب من البيت…

حمدت ربي ان السر اللي يتكلم عنه هو اعترافها بحبه..

لما كانت تتكلم مع شوق ..

وتاكدت إن شوق قالت عمها عن هذا الشيء..

أو إنه صادق وسمعها تقول هذا الكلام..

:::::::::::::::::::::::::::::::::::::::::::::

كانت بغرفتها تبدل ملابسها عشان تنام..

طلعت بجامة..لما أنتبهت على الملابس اللي أرسلتها لها صوفي..

شالت قميص النوم اللي من صوفي..ورمته بآخر الدرج..

وهي تهمس\قليلة أدب..

طلعت الفستان الذهبي وقررت تلبسه وتشوف شكلها فيه..

الى متى وأنا بناطيل وهم أشتقت للفساتين والدلع..

بدلت ملابسها ولبست الفستان سكرت سحابه ..

ووقفت قدام المرايه تناظر نفسها..

قصير يمكن يوصل لنص الفخذ…

من دون اكمام وماسك على الصدر..

حست بإحراج من نفسها على الشكل اللي هي واقفة فيه..

والله لو تشوفني امي لابستة تقطعة وتتوطى في بطني..

حركت شعرها وقدمت بعض الخصلات على قدام..

غرتها طايحة بشكل جذاب على جبينها..

قربت من المراية ووقفت على جنب ..

لو شعري لسى طويل كان راح يغطي ظهري اللي نصه عاري..

مدري كيف يتجرئون يلبسون مثل هذا اللبس…

خصوصاً ام سيقان الحمارة المنمشة..

الله يهديك ياصوفي لك وحشة..

أنتبهت على شيء غريب بجسمها..

قربت من المرايه أكثر..

وانصدمت باللي شافته..

بأعلى كتفها اليمين من ورى..

كان فيه علامة غريبة أول مرة تلاحظها..

حطت يدها على كتفها وشهقت ..

لما تاكدت إن هذي العلامة باقية كأثر من ضربها بالسوط..

همست بقهر\والله الآثار اللي بقلبي مابتموت..

فكيف بآثار على جسمي..

ياربي رحمتك يارب..

بكت بزعل على حالها وخبت وجها بفراشها..

كانت تتكلم وتبكي بنفس الوقت…

هديل بنحيب\كرهت حالي والله العظيم..

بأموت بحسرتي على هلي..

آآآهـ يارب لايشوهني أكثر..

ياربي لايضربني ماعاد اتحمل ضرب..

والله ياربي والله…

غفت بفستانها وهي تبكي….

جاهلة تمامــــــــــاً تواجد ذاك الجلمود بالقرب منها…

وجاهلة موعد قدومه الى المزرعة…

واقف كالتمثال المنحوت من الشمع..

خلف الباب الزجاجي ..

متواجد في بلكونة غرفتها تحت الثلج..

يشعر بخفقان عنيف بقلبه..

هل من رآها بذاك الجمال هي أسيرته لاغيرها..

آسيرته الغالية..

وكأن الحزن يزيدها جمالاً..

والبكاء يكحل عينيها دوماً..

ما أجمل أثيرتي..

لم يرها من قبل بهذا الشكل المغري..

يالدلعها العفوي…تستعرض نفسها امام مرآتها..

تجهل وجودي ومراقبتي لروعتها..

تعبث بشعرها المجنون..

لم أخسر جديلتها فهي تسافر معي وتغفو على وسادتي..

أما منظرها بشعرها القصير يزيد جراح جمالها..

يكاد قلبي يذوب لمرى إبتسامتها الحزينة…

ليتها تفقد ذاكرتها فلا يبقى للماضي أثر لديها…

أقسم ان ألون حياتها بألوان الخيال…

أسيـــرتي ما أعذبك…

يا لــنعومتها..نحرها يتصل بصدرها النافر بروعة التكوين..

خصرها الملتف يكاد يمزق ذاك الرداء…

أطال النظر لساقيها..

وأبحرت عيناه من جديد لتاملها…

إقترب من الزجاج متناسي لوعدهـ اللذي قطعه عليها..

بأن يحترم حدودها وخصوصيتها..

ولكنها تبكي…

وهو إعتاد أن يحتضنها رغماً عنها..

وأن يجبرها على البكاء بأحضانه..

تراجع وأبعد يده عن الباب الزجاجي..

وبقي هناك يتأملها حتى أدرك بأنها إنتمت لعالم الأحلام..

وأنها نائمة بكل تأكيد..

حاول أن يغادر المكان عائداً الى بلكونة غرفته..

لكن عقله..قلبه..

جوارحه..قدميه..

لم تمتثل لأمرهـ..

وأبت الا البقاء ومراقبت أسيرته النائمة..

يخاف عليها من نفسه..

فمنظرها قبل دقائق يسكن خياله..

فتح الباب الزجاجي..

ودخل الغرفة الدافئة..

إقترب وإقترب..

حتى إحتضنت يداهـ وججها الأليم..

قبلها على أعلى كتفها المجروح وإحتضنها وهو يهمس..

…..\سامحيــــني…

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛ ؛؛؛؛؛؛؛؛؛؛ ؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛

قفلت التلفون وهي تتنهد..

هذي ثالث مرة تتصل ولا يعطونها خبر مؤكد..

أدركت إن وقتها يضيع في ملل وفضاوة مو راضية عنها..

فقررت تدور على وظيفة وتشتغل بدل العطالة..

أتصلت بصديقة لأمها وهي عضو بارز في مجال التدريس..

وطلبت منها تساعدها بهذا الموضوع…

وعدتها تساعدها بس لازم ترسل اوراقها لهم عشان تباشر بمعاملتها..

أتصلت برشا وطلبت منها تروح لبيت امها وتأخذ ملفها وشهاداتها وترسلها لها..

طالب\السلام عليكم..

شوق تبعد السماعة عن إذنها\وعليكم السلام..

رشا\هذا طلووبي عطيني اياه باكلمه..

شوق\ماهو بلايق الدلع..المهم أبي اوراقي متى ترسلينها..

رشا\اليوم أو بكره اذا قدرت..

شوق\توقعتك تقولي بعد اسبوع..

رشا\ليه انا عند امي هالفترة..والحين اروح غرفتك وادور على ملفك..

شوق\وش مجلسك عند امي وين زوجك..؟؟

رشا\سافر..

شوق\ليه ماسافرتي معه..لايكون طلقك هههههههه

رشا بخوف\لو يسويها يريحني ويريح عمرهـ..

شوق\امممم ليه؟؟

رشا\شوق بالله قولي لي الصدق..أنتي قايلة لعمك شيء عني زمان؟؟

شوق\مثل أيش؟؟

رشا\إني أحبه ومن هالكلام…

شوق\مو وقته هالكلام..

رشا\لا وقته يا نصابة قولي الصدق..

شوق\أخوك يسلم عليك..

رشا\يوووه نسيت إنه عندك..طيب متى اكلمك..

شوق بكذب\لا تكلميني مشغوولة طول اليوم..

رشا\كذوووب ياعاطلة من زوود المسئوليات..

شوق\عندي تقديم وشغل ماتعرفينه يا جاهلة..

رشا\شوق اذا عرفت إنك قايلة لعمك شيء ذبحتك..

شوق\أتحداك توصليني شوفي كم كيلو بيني وبينك..مابتصيديني..

رشا\لاتنسين إنك عند اخوي..وأسرارك عندي..وأقدر أقوله كل شيء..

شوق أرتبكت\رشا قلبي أنتي تعوذي من إبليس…مايصير كذا..أنتي تعرفين الوضع..

رشا بمركز القوة\لا يصير ويصير..وش قايلة لعمك إنطقي..؟؟

شوق\خلاص ولا يهمك أكلمك بعدين..

رشا\لا ياحمارة الحين تتكلمين..

شوق\ان شاء الله يالله مع السلامة..

رشا\شوقوه لاتتنذلين ترى والله اتنذل فيك..

شوق\كثري منها مع السلامة

قفلت الخط قبل لا تكمل رشا كلامها وتهديدها..

طالب\أسمع تقديم وأوراق..وش السالفة؟؟

شوق بهدوء\أبي أقدم اوراقي ع الديوان..وأتوظف..

طالب\ماشاء الله..وبأذن من تتوظفين؟؟

شوق\بإذن الوزارة..

طالب بسخرية\ذكية تصدقين..

شوق بسخرية مماثلة\بعض ماعندكم..

طالب\أعتقد أني ماسمحت لك تتوظفين..

شوق\واعتقد إني ماطلبت رأيك..

طالب\مافيه وظيفة..؟؟

شوق\ما أقدر اجبرك توافق..

طالب\يعني تدرين إنك ماراح تتوظفين الا بإذني وموافقتي..

شوق\إيه أدري..لكن الوضع هذا مؤقت..

طالب\مؤقت..؟؟

شوق\إيه طال عمرك مؤقت..انا الحين أشتغل بأوراقي..

ومعاملات التوظيف يبيلها وقت مو بسيط..

على ما تقرر الوزارة توظيفي أكون رجعت لعهدت أمي واخوي..

طالب\واثــــــــــــقة انك راجعة لهم…؟؟

شوق\راجعة لبيت أبوي الله يرحمه..وحتى لو كانت امي واخوي مايبوني..

لي حق أظل في بيت أبوي وما احد له حق يمنعني..

طالب\وبيت زوجك..؟؟

شوق\مـــاهو بيتي…أنا ضيفة غير مرغوب فيها هنا..

وأنت تستنى اليوم اللي تفارقني فيه..

ولا يهمك هذاك اليوم ماهو بعيد..

طالب\تقولينها بمرارة…

شوق\إيه أقولها بمرارة..ماهو لأني متحسفة عليك….

قسوتك وجرحك لي شافاني من ارتباطي فيك من سنين…

طالب\والصــــــــــورة والمكتوب عليها..؟؟

شوق\كلام مراهقة…ماله أي وجود عند اللي جالسة قدامك…

وإنت رديت على الكلام بطيبة قلبك..

طالب بابتسامة\جرحك ردي على كلامك في الصورة..؟؟

شوق\أبــــداً…الجرح شيء متوقع منك..وهذا اللي تعودت عليه..

طالب بصدمة\تعودتي اجرحك..؟؟

شوق\لاتمثل دور المظلوم..ولا تتفاجاء…

راجع حساباتك وأوراقنا القديمة وأحكم بنفسك…

طلعت لغرفتها وهو ظل بالصالة يسترجع كلامها…

متعودة اجرحها…؟؟؟

صح إني قسيت بكلامي في الصورة..

بس هي متعودة على إسلوبي و على هالشيء..

ومثل اللي أنضرب على راسه أدرك إنه اعترف لنفسه..

إن شوق فعلا متعودة على قسوته وكلامه الجارح او المستهتر فيها..

وصار يسترجع ويغوص بذكرياته اكثر وأكثر..

وتذكر لما سوت عملية الزايدة لما زارها بالمستشفى كيف قال لها..

طالب\حتى الزايدة ما تحملتك أنفجرت ببطنك..الله يعيني عليك..

عصبت منه وقالت لغازي يخرجه من عندها وهم يضحكون عليها..

ولما تخرجت من الجامعة بارك لها بإسلوبه الجاف..

أرسل لها رسالة ع الجوال تهنئة بسيطة..

وفي النهاية كتب..

..الله يعين كنت متعذر بدراستك..

ألحين من وين اجيب عذر عشان أأخر الزواج..

وش رايك تقدمين على الماجستير والدكتوراة..

بكذا يتاخر زواجنا سبع سنين..

أنهالت عليه الذكريات مثل المطر..

كان كلامه لها يقصد فيه يثير عصبيتها..

لأن عصبيتها تعجبه من طفولتها..

بس ماحسب حساب انها ممكن تكون تجمع بقلبها كل جروحه..

ولما تمت ترقيته بشغله..

والهدية اللي أرسلتها له مع بطاقة تهنئة..

كلمها بس ماردت عليه..

فارسل لها رسالة..

هديتك وصلت..لو كنتي هنا رديتها لك..

باحتفظ فيها لحتى القاك واعطيك اياها..

مايناسبني نفاقك لي..

مافيه زواج قبل مئة عام….

الحين عرف ليه ماردت عليه ..

لانها كانت واثقة بانه مابيضيع الفرصة من دون مايبين لها انه مايبيها..

وزاد بجرحه لها لما هربت من المزرعة معه..

كيف كان قاسي معها بشكل كبير..

ويصرح لها بانه ينتظر اليوم اللي يقبلون هلها فيه ترجع لهم..

ولانه ما اعترف بغلطة وانه سبب في اللي صار بهديل..

حط كل المسئولية عليها..

ماكانت شوق راح تتبلى على هديل لو هو ماجرحها باعجابه بغيرها..

في اللحظة اللي اعترفت شوق وقالت انها شافته مع هديل بالغرفة..

ماهمته شوق واحساسها بهذيك اللحظة..

اللي همه نفسه..وكيف إنه إنكشف إنه اعجب بغير حلاله..

والمصيبة اللي كان يتغزل فيها هي هديل…

حط كل اللوم على شوق لانها أذت هديل…

بس مالام نفسه لانه أذى شوق..

وجرحها…

جرحها وهو يدري إنها تحبه من سنين…

وعت على الدنيا وهو قدامها…

نصيبها ومرتبطة فيه..

مايدري ان كان لها رفض او عدم رضا بفرضه عليها…

هو أختارهـا وتمسك فيها وقال لأخوها إنها له ومايعطيها لغيرهـ…

بس ماراعاها…

كانت تصرخ فيه بغيض..تقول طلقني..أو اخلعك..

ودائما تقول إني ما ابيها ولا مرة قالت إنها ماتبيني….

وصله مسج ع الجوال صحاه من عالم الذكريات..

قرء المسج وتنهد بضيق..

كان من رشا ..

مساء الخير يا حلو أخبارك؟؟

وينك يالقاطع ماتكلم أختك حبيبتك..

ولا شوقوهـ تمكنت من قلبك البارد..

وخلتك تحبها أخيراً وتنساني..

كلمني لما تقدر..

وصفت البرود ياما نعتته فيها شوق..

بالبرود والاهمال وعدم المبالاة لها..

قرر يتكلم معها ويتفاهم معها على كل شيء…

وبنفس الوقت ما أدرك..

إن شوق أبحرت من شؤاطى الإنتظار من زمان..

ومالها نية ترجع تتعشم بحياتها معه…

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛ ؛؛؛؛؛؛؛؛؛؛ ؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛

ناظرت بالمراية مفجوعة من منظرها..

حطت يدها على رقبتها مستغربة اللي تشوفه..

معقولة ناموس يسوي كل هذا..

بس ما أذكر الناموس يجي بالشتاء..

يمكن ناموس هذولاء غير ناموس شتوي…

يقطع عمـــرهـ كل هذا منه..

باقوول لماريا تشوف حل لهاالناموس قليل الأدب..

أستاهل لو لابسة بجامة بدل الفستان كان ماقدر يأكلني كذا..

فيه احد ينام بفستان مالت علي..

عفست فستاني المخلع العاري القليل السنع..

راح اخبيه لغادة ولا سارة قليلات الادب..

هذي علوومهم ملابس مخلعة يامال الصلاح..

لبست كنزتها وخرجت من الغرفة..

نزلت دورت على ماريا بس مالقتها في المطبخ..

جلست بالصالة الحجرية…قريبة من النار..

وفزت لما سمعت صوته..

غازي\صبــــاح الخير..

أنصدمت من وجودهـ في القصر..

وتسالت متى رجع..

وقفت مكانها بجمود وماردت عليه..قرب منها..

غازي\كيفك..؟؟

هديل ماعرفت وش ترد وتقول..هو يعرف حالها من دون مايسال..

تقول بخير..ووين الخير منها..

نست معناه و ولونه..

همست\الحمد لله..

أنتبهت على نظراته على شعرها..

هي مالبست حجابها لانها واثقة مافيه غيرها هي وماريا والخادمات..

لو عرفت انه رجع كان لبست حجابها وعلى حسب وعده بانه راح يحترم حدودها..

وما يمنعها من الحجاب قدامه..

هديل\تقبل الله حجك وغفـــ…. وغفر ذنبك

غازي\منا ومنك..

طاهرة القلب…رغم جراحها وألامها منه الا أنها قالت غفر الله ذنبك…

أي فتاة صابـــرة انتي..؟؟

غازي\وش هذا اللي برقبتك؟؟

هديل حطت يدها على رقبتها\نــ ـاموس..

غازي\ناموس؟؟

هديل\ناموسهم مدري وش يحس فيه جاي في الشتاء..

غازي\هههههههههههه ماعنده سالفة..

هديل\تتمسخر علي؟؟

غازي عذبته برائتها\لا أبداً..

هديل\بلى تضحك علي..عساهـ ياكل رقبتك مثلي..

غازي بخبث\فديته إن كان ناموسي مثل ماكان ناموسك فلبى قلبه..

هديل مصدومة\أنت مريض؟؟

غازي\إيـــــــــــه..

هديل ببرود\أحســــن..

خرجت من الصالة وهو واقف مكانه يضحك على ردها عليه..

ماكان متوقع أبدا تقوله سلامتك..

بما أن عدوي مو قادر يساعدني..

فمالي الا ربي اتوكل عليه ثم نفسي..

راح ألعب لعبتك..وأنتظر غفلتك..

وبعدها وعــــد مني لأخليك تندم على دفني وانا حية معك..

وأرجع لأمي وهلي..

وإنت تهنى بهلك..

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛ ؛؛؛؛؛؛؛؛؛؛ ؛؛؛؛؛؛؛؛؛؛؛؛؛؛؛

كانت جالسة تناظر الشوارع الممطرة بغزارة..

مو قادرة تحضر لمحاضراتها..

ولا قادرة تركز بموادها…

مو مصدقة اللي هي سوته..كيف قلبت حياتها بارادتها..

كيف سمحت لغباء الانتقام يسيطر عليها..

لو وافقت على مالك وتجاهلت كل شيء..

هي بتأخرها في الرد..

تركت مجال لعمها وولدهـ يدخلوا بالموضوع..

سرحت تتذكر الحرب اللي صارت في مجلس أبوها..

في مجلس ابو علي…بعد رجوعهم من الحج بيوم..

كان صوت العيال عالي بالصراخ ..

علي وراكان كل واحد منهم يحاول يضرب الثاني..

بس الشيبان فكوا بينهم قبل لا يبدون الهواش..

ابوعلي\انطم يالرخمة أنت واياهـ..مابقى الا تسدحوني وتدوسون علي..

علي بعصبية\والله ما يعرفها لو يلمس السماء..

راكان\بنت عمي واولى فيها من خويك ومن غيرهـ..

علي\لاتنسى كلامك يالنذل يا الخسيس..

ابوعلي بغضب\حسبي الله عليك وعليه..لابركة فيكم ولا في مجلسكم..

إنقلعوا برا بيتي يا ثنين غضبي عليكـــــ ……

ابوراكان\لا ياحسين اذكر الله وادحر ابليس عنك..

استغفر ربك وصل على النبي..

وهذولاء الكلاب انا اوريك

فيهم..
سحب ولدهـ وخرجه من مجلس ابو علي..

وطرد علي وراهـ..

خرجوا محمد وهادي وسلمان يحاولون يهدون بين الاثنين..

علي\تخسي ماتعرفها يا الكلب..

جاي بعد سواتك ولك عين تطالب فيها ماتعرفهــــــــــــــا..

راكان\والله ما اخليها هي بنت عمي وحيرت عليها..

ولو تبقى سنين معلقة في بيت أبوها ما تركتها..

هادي بغضب\مايحق لك تخطب على خطبة مسل مايحق لك..

راكان\يحق لي لأنها لي من قبل لا يتكلم فيها غيري..

طلبتها ووافقت وانتشر الخبر..

علي بصراخ\واللي أنت سويته وش تسميه..؟؟

راكان\خسة نذالة حقارة مثل ماتحب سمه..

عرفت خطاي وتراني معذور باللي سويته لو انت مكاني سويت اكثر..

علي يرمي عقاله بقوة على راكان ويهجم عليه يضربه..

وراكان كان ردهـ بنفس قوة علي..

علي بغضب\معذور يالخسيس تقول معذور..

الشرهه على اللي مافضى الرشاش في صدرك من أولتها..

راكان\لو سويتها أبرك من أنك تعطي نصيبي لغيري..

سلمان ومحمد وهادي يحاولون يفكون بين الثنين بس ماقدروا..

كل ماسحبوا واحد هجم الثاني عليه…

أبو علي خرج من المجلس واخوهـ معه..

أبو راكان يسحب علي بالغصب ويوقف بوجهه..

أبو راكان\مابقى لعمك حشيمة ولا قدر في بيتك يا ولد حسين..؟؟

علي بغضب\الحشيمة لك ولسلمان بس ذا الخاين ماله حشيمة..

راكان\خاين واللي تبي بأخذها غصبن عليك..

علي يبعد عمه ويحاول يرجع يتضارب مع راكان…

الجدة بجزع تبكي\أمك يا حسين..تبون تذابحون يالحريم..

تبون تسيلون الدم بينكم..مابقى لدمكم كرامة عندكم…

نسيتوا أنكم أخوان ودمكم واحد..نسيتوا من أنتوا عياله..

حسبي الله عليكم وتقولون رجاجيل وعيال حمايل..

تخسون ماحولكم مرجلة يالحريم..

أبو علي يمسك امه يحاول يهديها..

دخلها المجلس والباقين دخلوا وراهم…

أبو راكان\أذكري الله يومه الزعل ماهو بزين لك..

الجدة\وهم خلوا لـ الزين محل…لو يحترمون ويقدرون ماسووا سواتهم..

أبوعلي\هذا أنتي يومه أحكم باللي تريدينه..

واللي تامرين فيه يمشي على الجميع..

الجدة\مايمشي حكم المره على شيبان بلحاهم..

أنت أبو البنت وأنت ملفاها..

كنك راضي برويكن لها الله يسدد لهم..

بس قلبي ماهو براضين عليه ولا على قربه..

راكان\يومـــه اسمعـــ……

الجدة\ولا كلمة ولا تكلمني..حلفت ماتعرفها ولا تقربها..

وانا على حلفي الا اذا خالفني ولدي..

ابوعلي\وراكان ماله عندنا مرهـ…والله ييسرهـ طريقه ..

راكان\وبنت عمي ماني مرخصها وان طالت ولا قصرت..

لا انا ولا غيري نعرفها..

ابو راكان\خلاص ياولد الزواج ماهو غصب…

كانت لك وأنت اللي رفست النعمة..ويشهد الله ماني بعارف وش اللي جاك..

ولا وش اللي غير راي عمك وهله..

هي بنته وأنت ولدهـ..وماهي بنصيبك..

علي\خله يهايط على كيفه يا عم..

عــــــرف قدرهـ ومنزاله…

راكان وقف بعصبية\والله ياعم والله والله..

إن خرجت من بيتك الليلة وغادة ماهي بزوجتي..

لأذبح خوي علي وأعيد سالفة هادي وسلمان..

وأسلم نفسي لـ القصاص وأكون ميت ومرتاح..

إن مالك ما خذاها..

أبو علي وأبو راكان تجمدوا من كلام راكان..

مصدومين ملكومين من جرئته على فتح جراح قديمه..

مايعرفها غيرهم ولا يقدرها مثلهم..

الجدة بعصبية\انثبر ياولد لا أذبحك قبل تطلع من المجلس..

راكان بصوت ناري\واللي خلقني ان ماملكت على غادة الليلة..

ليكون ممسى مالك الليلة في المقابر..

علي هجم على راكان وضربه ..

علي\هذي مرجلتك يالخسيس..تبى تجبرنا نوافق عليك..

راكان يضربه ويرميه بعيد عنه..

راكان بقهر\حلفت وتراني بايع حياتي برخيص التراب..

هادي\تبي تذبح الرجال من دون حق..؟؟

راكان\مثل ماذبحت ولد الناس من دون حق…

هادي يصرخ بقهر\لا تحكم على شين ماتعرفه يالخسيس..

سلمان\راكان أذكر الله..وش تذبح مالك أنت صاحي..

تقتل نفس من غير حق..؟؟

راكان\وانتوا يالمجرمين..قتلتوا وشردتوا من الديرة..

ولولا الجمايل والمناصد لغازي وهله مارجعتوا..

أبو علي بصوت مقهور ومخنوق\تخسي وتهبي لولا ربي ثم اللي تجهلونه..

مارجعوا ولا عرفناهم..

وش ذنبنا يوم تذبحون العرب وتبلونا بمصايبكم..

ليه ماكلن يتحمل وزر أفعاله وأغلاطه..

وش ذنب اللي بعناهم علشان نلقاكم..

وين نلقى اللي ذبحناهم لعيونكم..؟؟

خلفناكم نبي نقابل الله فيكم بالعبادة والخير..

عاقبتونا ليه ان حن انجبناكم يالهابين…

تبي تذبح ولد الناس رح إذبحه..

واشرب دمه..بس بنت ماتعرفها ولا تكون لك..

قهرتوني في بناتي وأحرقتوا قلبي..

لابركة فيكم ولا في اللي خلفوكم..

أبو راكان\من انت؟؟وش انت من البشر ياولد..

ماتذكر معاناتنا مع العرب والقبايل عشان نرجع أخوك وولد عمك..

ماتخبر ضيقنا وكربنا ..

أمك وحزنها على أخوك..خواتك وشوقهم له..

وانت ماتذكر وش سويت عشان يرجع عضيدك ولا تنقص رقبته…؟؟

راكان\مانسيت ولاني بناسي..

بس اللي لي ما اتخلى عنه ولا أخليه..

وعهدن علي ان ماكانت الليلة بذمتي ليكون مالك بذمة رب العباد..

أبوعلي بصراخ\حــــرام ماتقول عليك قبوووول …

……..\أنا موافــــــــــقة يوبـــــــــــه …

كل اللي بالمجلس ألتفتوا على اللي واقفة عند باب المجلس..

ماعدا راكان والجدة..

كانت لابسة عبايتها ومتغشية بطرحتها ..

وامها واقفة جنبها..

علي بعصبية\غادة الشور ماهو بشورك…

غادة بصوت مخنوق\يا أبو عبدالله تكفى..

أنفضحنا بين العرب وكفانا ما جانا..

لاني بشرانية ولا خسيسة..

يوم أخلي هلي يتذابحون وأنا أقدر أحل الأمور بينهم..

أبو راكان\وأنتي راضية يابنتي براكان؟؟

المهم رضاك ماهو برضانا؟؟

غادة تحاول تقنع الجميع بكلامها..

وتقصر السالفة اللي وصلت لـ لذبح والقتل..

غادة\إيه ياعمي راضية..

راكان ولد عمي..وإن كنت انجرحت منه بكلمة قالها..

بس ربي يسامح وأنا سامحته..

أم علي\أقصروا الشر وأذكروا ربكم..

ترى شيبانكم ماعاد يتحملون الضيم منكم..

مارجعوا أخوانكم الا بعد ماذقنا العناء والويل..

أرحمونا تكفون أرحموا شيبانكم..

أبو راكان\وش تقول يا أبو علي..؟؟

أبو علي مارد عليهم وظلت عيونه متعلقة في بنته..

يعني أختك راحت عشان ننبسط بهادي..

ويرجع ولد عمك..راحت مضحية بكل شيء..

غافلة عن اللي ينتظرها من غربة من هلها..

جاهلة قسوة أبوها انه بيشيعها جنازة..

وأنتـــــــــي تبين تسوين سواتها..

تبين تضحين عشان هلك وعمك ..

لا يــا أبوك مايعرفك وراسي يشم الهواء..

يا حسرتي في أكبر ذنوبي..

ماتعادلها حسرة يا غادة..

أبو علي\والله واللي خلق السما وبسط الأرض ماتعــــ ……..

غادة تحب يد أبوها\تكفى يوبـــه..بسنا قهر وضيق..

بسنا عنا من القتل والثار..

ماهو بعلشانه علشانك عشان عمي وعمتي..عشان خواته ..

عشان مالك وأمه وهله..

يوبه حسرة الموت اللي ذاقوها هل القتيل..

ذقناها بموت هديل..

ليه ترجعون علينا حسرة الموت بلحظة شيطان..

سامحه يوبه أنا سامحته سامحه..

أبو علي يضم بنته ويتحسر على هديل..

اللي تمسكت فيه بيوم مترجيته يضحي فيها ..

مترجيته يدفنها بالحياة..

ويرجع أخوها..

نزلت دموعه من القهر والضيق..

خلا المجلس من العيال ومن غادة وأمها..

ومابقى غير أبو علي وأبو راكان والجدة..

أبوعلي\يومــــه..مستوجعة من شيء..؟؟

الجدة بحسرة\ياويلي منك ياحسين..

ياويل أمك وش اللي أنت سويته..؟؟

أبوعلي برعب\وش تقصدين ..؟؟

الجدة\وش مخبي ياولد أمك..

من اللي بعتهم من اللي ذبحتهم عشان ولدك؟؟

وش اللي نجهلــــه؟؟

أبوراكان\الله يهداك يومه..وش اللي تقولينه..

حسين مايقصد شيء..

رفعت نظرها وناظرت بوجه أبوعلي..

كان منكس راسه..ودمعته طفرت من عينه..

وقفت ومشت تبي تطلع من المجلس..

الجدة\بأنتظر معك ياأمك..

بأنتظر وأذوقك حزنك وفرقاك..

أنتهى ذاك اليوم بليله..

وغادة صارت مرة راكان وبذمته..

صحت من سرحانها على صوت هادي يناديها…

هادي\غادة أمي تبيك تعالي كلميها..

غادة\هلا يومه..

ام علي\هلا ياقلب أمك..كيفك؟؟

غادة\الحمدلله بخير..طمنيني عنك وعن أبوي وأخواني..

ام علي بعصبية\طيب أصبر يا النشبة..ياولد فك السماعة..

غادة\يومه وش فيك..؟؟

ام علي\عبيد يضاربني على السماعة يبي يكلمك..

غادة\الــــــــــــــوغد ما ابى اكلمه..

عبدالله\ماوغد غيرك يا اليزابيث الجاسم..

غادة\ههههههههههههه وش عندهـ وليم الجاسم..

عبدالله\ابى اكلم عمتي وأصل رحمي حرام ولا كفرنا..؟؟

غادة\لا لا لا حرام ولا كفرتوا..

مير ماهي بعوايدكم يا الأوغاد تصلون أرحامكم وتقولن عمتي الا وفي بالكم موال..

عبدالله\دائـــماً أقول مايفهمني الا الوغدة غادة…

غادة\يعني ماتبى تتربى يا الوغد..؟؟

عبدالله\عمتي يا نظر عيني…يرضيك حالي..

مطفر مافي جيبي ريال..ولا قرش..يرضيك حالي..؟؟

غادة مفجوعة\ياويلي منك يالسرروووق تبي تنهبني حتى وانا في بريطانيا..؟؟

عبدالله\بس ابى سلف وارجعه لك لما نزلت الرواتب..تعرفين حن الحين نص الشهر ومافيه راتب..

غادة\كيف اعطيك فلووس وبيني وبينك قارات ومحيطات..؟؟

عبدالله\ظرف المهر اللي مع جدتي ابى منه بلاك بيري..

غادة\اي مهر واي ظرف..أنت وش تقول؟؟

عبدالله\مهرك يا الدوبة ابى منه جوال بلاك بيري..

قولي لجدتي انك موافقة عشان تعطيني الفلوووس..

غادة بعصبية\عطني أمي..

عبدالله\اول عطيني الفلوس..

غادة بصراخ\عبييييد قلت عطني أمي..

عبدالله\طيب بس ماخذها ماخذها..

ام علي\هلا يومه..

غادة\اي مهر اللي عبدالله يتكلم عنه..؟؟

ام علي\ملقوف ذا الولد..مهرك جابه عمك وولده اليوم وعطوه ابوك..

غادة بقهر\وليش أخذتوا المهر منه…؟؟رجعوه له يومه ما ابيه..

ام علي\ابوك رده بس عمك حلف مايرجع..

غادة\والمهر الاول والجهاز اللي جهزته مايكفي..؟؟

ام علي\أي جهاز..؟؟ناسية أنك عطيتي جهازك لريم بنت خالك..

وان علي رجع المهر كامل لراكان..

غادة مخنوقة بعبرتها\أكلمك بعدين يومه مع السلامة..

دخلت غرفتها وهي تبكي بقهر..

هين ياراكان هين..

والله لا أطعنك مثل ما طعنتني…

والله لا أشربك الظيم واللي ذقته منك لا أذوقك إياهـ..

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛ ؛؛؛؛؛؛؛؛؛؛ ؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛

دخل جناحه تعبان من آخر إجتماع له اليوم..

تسبح وصلى فرضه..

وفتح شنطة أوراقه يراجع آخر القرارات..

بعد نص ساعة دخل الأوراق بالشنطة وأستغرب وجود اوراق ثانية..

خرج الملف وأول مافتحه تذكر هذا وش يكون..

هذا الملف الخاص بغازي الصغير..

واللي أخذه راجح من بين أغراض رشا لما كان معها في بيت طالب..

فتحه وتصفح اوراقه..

شهادة ميلادهـ..ولد في الكويت..كويتي الولد لبى قلبه..

تطعيماته ..أوراق المستشفى..

ركزت عيونه على اسم الأم رشـــــا..

على تاريخ الولادة..

متى ولد ومتى طلع من المستشفى…

قفل الملف ورجعه بالشنطة..أنسدح على فراشه وغمض عيونه..

وتردد في باله لما حضر زواج سعود ورشا…

كانت في باله وناوي يخطبها..

تفاجاء بخطبت سعود لها وهو ماكان يفكر فيها أبداً..

مثل الملسوع قام من مكانه بسرعة..

وقف دقايق متصنم بمكانه..

مايتحرك فيه غير عيونه..

يسترجع ويسترجع..

فتح الشنطة بسرعة ونثر كل الأوراق..

فتح الملف الخاص بغازي..

وراجع موعد الولادة..

الولد مولود بشهره التاسع…كامل..

بس ولد بعد زواج امه وأبوهـ بست شهور…

كيـــــــــــف يعيش وهو مولود بالشهر السادس..

وكيف يكون مكتمل..؟؟

ويطلع بعد الولادة بيومين…؟؟

الولد مولود وهو مكتمل ومتمم أشهره التسعة…

يعني هو متكون في بطن أمه قبل لا تتــ ……………

ماقدر ينطق الكلمة…

حتى بينهوبين نفسه ماقدر ينطقها…

حملت بولدها قبل الزواج بسعود…

معقــــــــــــــولة رشـــــــــــــــا..

وسعود تزوجها لانها اخت اخوهـ وعرض أخوهـ ..

ونسب الولد له …

تلبســـه الغضب والأفكار تأخذه لأبعد من الحقيقة..

لأبعد من الصواب..

في دقائق كان لابس ملابسه وشنطته في يدهـ ويخرج من الفندق متوجه للمطار…

؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛ ؛؛؛؛؛؛؛؛؛؛ ؛؛؛؛؛؛؛؛؛؛؛؛؛؛؛؛؛؛؛؛؛؛؛

كانت واقفة جنبه تنتظر تشوف الحصان الجديد..

اللي أشتراهـ غازي …

ماتدري ليش قررت تطلع معه..

مع أنه حاول يمنعها وقال تشوف الحصان بعدين بس هي أصرت تخرج معه..

هديل تلبس قفازاتها\لا بأروح معك..

غازي يكتم ابتسامته\رايح الألعاب أنا..؟؟

شوفيه بعدين..لان الحصان ماهو مروض يعني عصبي..

هديل\غريبة منهو يشبه..؟؟

غازي فاهم عليها\الله أعلم..

المهم أجلسي هنا لحتى ندخله الحضيرة..وبعدها يصير خير..

هديل\طيب..

خرج وهي أنتظرت دقايق وبعدها طلعت وراهـ..

ولما شافها عقد حواجبه..

غازي\ما تتوبيـــن..

هديل\عـــــــــادي إضرب يمكن أعقل..

غازي يركز عيونه في عيونها\أنا وعدتك…

هديل\ماراح توفي بوعدك وأنا متأكدة مثل ما انت متأكد…

غازي\نشوف…خليك بعيدة وقفي هنا..

الحصان هايج ويمكن يثور ويهرب..

ما أبيه يشوفك قدامه بيتوطاك..

سوت مثل ماقال لها ووقفت بعيدة عنه..

خرجوا العمال الحصان وهو يصهل ويضرب الأرض بعنف..

ويبي يفلت من الحبال اللي مربطته وتسحبه..

خافت من صوته ومن ثورته..

وقارنت بينه وبين الفرس اللي كانت تخاف منها..

والله كانت هادية ومسالمة مو مثل هذا الأسود الخبل..

مجرم شكله خريج سجون..

ابتسمت على خيالها وهي تراقب محاولاتهم لتهدئت الحصان..

غازي كان يصرخ على العمال بلغتهم..

ويطلب منهم يخففوا الشد من على رقبته..

لأنهم راح يخنقونه وكل واحد يشدهـ بجهه..

واحد من العمال ترك الحبل اللي بيدهـ..

وهو فاهم قصد غازي بالغلط..

وبهذي اللحظةرفس الحصان العامل الثاني وطاح تارك الحبل..

مابقى الا فكتور وهو يشد من جهة جانبية لكن ماقدر يتحكم بالحصان..

اللي صار يركض ويسحب فكتور على الأرض معه..

غازي وباقي العمال كانوا يركضون وراهـ ويحاولون يحصرونه بالمضمار الخاص بالخيل..

ترك فكتور الحبل لما شاف الحصان دخل المضمار وقفلوا الباب عليه..

بس كلهم تفاجئوا لما ظل يضرب الأرض ويضرب..

وصار يركض بالمضمار وبعدها قفز من على الحواجز..

وصار يركض بحرية..

هديل جمدت بمكانها خايفة ومرعوبة وهي تشوفه جاي يركض لها…

رمت نفسها على الأرض وضمت حالها بقوة..

وهي تصرخ بخوووف..

بعد لحظات حست بيدين ترفعها وتقلبها على ظهرها..

غازي برعب\فيك شيء..؟؟

هديل تناظر فيه بخوف وماترد..

غازي بعصبية\ردي ضربك الحصان…صارلك شيء..؟؟

هديل تهز راسها بلا مو مستوعبة انه ما داسها..

لو مارمت نفسها على الأرض كان الحين هي ميتة تحت أرجوله..

أستاهل جزات اللي مايسمع الكلام..

غازي يوقفها وهو مركز عينه عليها..

غازي\أكيد ما سوت لك شيء..؟؟

هديل.…… لا مــ ماشيء..

غازي\والحين بتسمعين الكلام وترجعين القصر ولا كيف..؟؟

هديل\لا بأسمع الكلام وأرجع القصر..وما اجي مرة ثانية هنا …توبة..

وصلها القصر ورجع لـ العمال اللي مسكوا الحصان ويحاولون يدخلونه الحضيرة المغلقة في الإسطبلات…

https://www.barabic.com/stories/124627/