رواية زهرة والبيت الملعون الجزء الرابع
بداية قصة زهرة مع الرعب بعد ما اضايق جدا عرفة الدجال من اختفاء الكنز والتماثيل .مشى وهو بهددنى بحاجات هتحصل ليا بسبب انى فتحت الكتاب فى المقبرة ومش بس كدة اكتشفت انهم سابوا الحفرة زى ما هى .
كان جسمى واجعنى اووووى من الخضة وال حصل تحت فى المقبرة زى ما يكون حد كدة ضربنى بحديدة ومكسر كل جسمى
اخدنى جوزى علشان استريح على السرير و احاول انام شوية.
دخلت وانا مش شايفة قدامى من التعب ونمت نوم عميق . لكن حلمت ان فيه دخان كثيف جدا من الحفرة طالع فى البيت على شكل انسان وحش اوووى الدخان ده لف ودخل البيت كانه بيدور على حاجة لحد ما دخل عندى الاوضة وانا نايمة .
اول ما دخل الشكل المتوحش دة هجم عليا زى الاسد وابتدى يسحبنى من رجليا من على السرير مكنتش قادرة اصرخ او اقول لجوزى الحقنى كأن حد كاتم نفسي وحاطط ايده على بئقى .
كنت ببكى علشان يسيبنى لكن كان بيسحبنى من رجليا على وشي لحد ما وصل للحفرة ونزل فيها بيا .
كنت بتخبط فى راسى و وشي فى الارض والرملة.
كنت بتألم جدا من الخبط فى الارض لحد ما دخل بيا المقبرة بعدها باب المقبرة اتقفل علينا .
لكن الحمد الله لقيت فؤاد بيصحينى من النوم وبيقول اصحى اصحى يا زهرة انتى بخير . مصدقتش نفسى انى صحيت من الكابوس دة . قمت ابكى وقلت لجوزى عاوزين نردم الحفرة دى . حاسة انها وراها مصايب .
تم ردم الحفرة ولكن !
مرت الليلة كأصعب ما يكون على زهرة وتانى يوم ومن اول النهار ردمت انا وجوزى الحفرة وبعد ما ردمتها حسيت انى قفلت باب جهنم كان مفتوح علينا .
بعد ما خلصنا الردم بصيت لجوزى وقلت ليه : انا خايفة اوووى من البيت دة يا فؤاد ……. ياريت نعزل منه ونسكن فى مكان تانى .
بص ليا وسكت و فكر وبعدين قال : بس دة بيتى ملكى وارثه من ابويا وجدى مينفعش ابيعه . قلت ليه مش لازم تبيعه….. اقفله ونسكن فى شقة بعيدة شوية . قال ربنا ييسر هشوف .
مر اليوم طبيعى جدا وحسيت ان الامور بقت احسن . وانا خلاص ابتديت اتأقلم على العيشة بعيد عن البيت دة وبقيت اجهز حجاتى و كمان منها اضغط على جوزى للرحيل من البيت .
رجع جوزى من الشغل سألته عملت ايه شفت مكان جديد ؟
قال اصبرى انا بدور والله وكلمت ناس . انتى حصل معاك حاجة تانى ؟ قلت لا مفيش حاجة حصلت . سكت وقال طيب ما يمكن خلاص مفيش حاجة هتحصل الكنزاختفى والحفرة اتردمت وكدة خلاص بقا ….. يمكن المشكلة اتحلت .
صرخت وقلت مستحيل اقعد هنا …هى اتحلت او لا مش هقعد فى البيت المرعب ده ….انا جهزت حجاتى فى اى وقت بكرة بعده فى خلال اسبوع لو مفيش سكن جديد انا هاخد ابنى واروح بيت ابويا لحد ما تلاقى سكن تانى .
جوزى بص ليا مستغرب اوووى وقال معقولة للدرجة دى !
كانت نظراته ليا استنكار وعتاب . لكن انا قلت ليه انا اعيش معاك حتى فى اوضة متر فى متر بس هنا لا وبكيت .
سكت لما عرف ان الموضوع فعلا لا يطاق خلاص لانه عارف انى مش بحب اروح عند بابا علشان مرات ابويا . ولما اقول كدة دليل ان خلاص فاض بيا فعلا .
وفعلا بعد اربع ايام رجع فؤاد وقال: خلاص يا ستى انا لقيت شقة قريبة من هنا الشارع ال ورانا على طول . فرحت اووى وقلت هنمشي امته من هنا ؟ بص ليا واستغرب وقال طيب مش لما تشوفيها ممكن متعجبكيش ! قلت لا انا موافقة .
بص ليا وضحك وقال خلاص بكرة هنجيب عربية ترفع العفش وهنام فيها بكرة ان شاء الله . وفعلا تانى يوم صحينا جهزنا كل حاجة هنحتاج ليها …..و راح جوزى يجيب عربية .
بداية اللعنة
نزل فؤاد يجيب عربية وانا دخلت البس هدومى وابنى نايم على كرسي فى الصالة . لبست ودخلت الحمام علشان اظبط الحجاب على المراية …. زى كل مرة بخرج من البيت .
وانا واقفة فى الحمام و ببص فى المراية لقيت الحيطة ورايا بتتفتح زى باب الاسانسير اتعدلت وبصيت ورايا فجأة لقيت دخان كثيف جدا خرج بسرعة و ملا الحمام مشفتش حتى ايدى او رجليا .
صرخت بأعلى صوتى الحقونى ….. الحقونى …. لكن فجأة لقيت نفسى فى مكان ضلمة اووى زى القبر حاوت اتحرك مش قادرة قعدت اصرخ باعلى صوتى لكن صدى صوتى كان بيرد ليا بشكل مرعب اووووى .
فجأة سمعت صوت بيقول ليا اخرسي … سكت كدة على الصوت ….. كان صوت ست مش راجل . سكت علشان اعرف فى اية . سمعت بعدها صوت خطوات عدد كتير زى ما يكون فى ناس كتير جايين عليا ومش شايفة حد .
كشف سر الاختفاء للكنز
فجأة صوت الخطوات وقف ولقيت صوت كبير زى ما يكون فى ناس كتير بتتكلم فى وقت واحد . سمعت الصوت بيقول : انتى فاكرة انك هتقدرى تبعدى عن البيت دة ؟!
مستحيل تبعدى عن هنا…. انتى ضيعتى الكنز مننا ولازم نلاقيه بيكى انتى ….. انتى المفتاح للكنز .
صرخت وقلت سبونى….. سبونى ارجوكم انا مليش دعوة
كنت فاكرة ان دول ناس تبع عرفة بعتهم علشان الكنز . رد عليا الصوت المجمع دة وقال : محدش هيسمعك انتى تحت الارض
احنا ارواح الاسرة الحقيقية صاحبة الكنز .
الاسرة الحاكمة اخدت كنزنا ودفنته معاها وعلشان كدة كان لازم واحدة بنفس مواصفاتك تفتح الكنز . وكنا خلاص هناخد الكنز لولا انتى فتحتى كتاب اللعنة اى حد يفتحه ….الكنز يختفى ويروح مكان تانى .
انا صرخت وقلت مش هسيبك يا عرفة على ال بتعمله فيا دة
كنت فاكرة ان عرفة الدجال بعت ناس تخطفنى علشان الكنز
لكن سمعت ضحك بسخرية وفجأة لقيت المكان نور .
ببص كدة لقيت نفسى بين اربع حيطان مفيش منفذ او باب خروج كلها جدران ومكان ضيق اوووى . وسمعت نفس الصوت بيقول احنا مش تبع عرفة ومفيش حد يقدر علينا من الجن .
علشان كدة اسمعى الكلام ونفذى كل المطلوب منك والا مش هيحصل ليكى خير وهندمرك انتى وجوزك وابنك لو حاولتى تبعدى عن البيت دة فاهمة .
صرخت وقلت حاضر ….. حاضر وانا ببكى وبترعش مش مصدقة كل دة . وقلت ليهم خرجونى من هنا ارجوكم بسرعة
يا ترى هيحصل ايه ؟
يجب أنت تكون مسجل الدخول لتضيف تعليقاً.